意大利天氣開始轉涼，米蘭溫度平均喺 11 至 15 度之間。家人亦開始製作聖誕特色飲品（其實係烈酒）- VOV！ 記得第一次飲 VOV 係喺老公嘅 uncle 屋企（當然都係自家製啦）。VOV 係用蛋做 base 嘅甜酒，酒精濃度好高，所以飲一小杯就夠！另外仲有一種好精彩嘅飲法，就係將佢加入平時飲開嘅 espresso，未試過嘅真係要試吓，試諗吓兩種各有自己好 strong character 嘅飲品，淨係單獨飲都俾到一種強烈味蕾刺激俾你，如果加埋一齊嘅味道會係點？太特別啦！成日都想認認真真戒糖，但係年年冬天都係失守，今個禮拜失守喺呢樽 VOV 到！